ئه‌یاز خوون سیاوه‌شان

( 1 ) 

سپیی سپی

                له‌ نێوانی مه‌لافه‌یه‌کی سپی دا !

سپی تر به‌ڵام

برووسکه‌ی تاسه‌یه‌کی چڕ

                 له‌ شه‌وگاری له‌شی سپیت!!

(2 )

کلوو کلوو شه‌و

له‌ کاژێره‌کانی به‌فردا

                           _ ئه‌سته‌مووڵ _

تا چاو بڕکا زه‌مان و

                          تا نالی

                                  ته‌نیاتر شیعر !

ده‌دره‌وشێته‌وه‌ به‌ڵام

                         سپیه‌تی جامانه‌یه‌کی سه‌وز

                                                        له‌ ترۆپکی ژانویه‌دا ......

( 3 )

له‌ زستانی ئێواره‌یه‌کی ته‌نیا دا

له‌ ته‌م توومانی دووڕێیانی کراسه‌که‌ت دا

ئه‌م به‌رت مه‌حاڵ و

ئه‌و به‌رت دارستان ،

زه‌نگۆڵ زه‌نگۆڵ تاریکی

                                له‌ هه‌ناسه‌ت دا ؛

نه‌ موسیقای جگه‌ره‌یه‌کی بێدار و

نه‌ ئاوازی سه‌هۆڵاوی مرۆڤێک

                                         ته‌نانه‌ت !

مۆته‌که‌یه‌ک

                  ته‌نیا مۆته‌که‌یه‌ک

                                       له‌ شه‌قامی به‌فرینی هه‌نگاوه‌کانت دا ......!  

ئه‌سته‌مووڵ 2004